هذه ليلتي

 مجموعتي الرابعة (تلاتين سنة) بقلم د/ خالد الشريف

النص الرابع والتسعون

 94- ( هذه ليلتي )

لحق حامد ركب التعيين من السبنسة ؛ انطبق عليه المثل الشهير (إن فاتك الميري إتمرمغ في ترابه) 😊 كان مرتبه 370 جنيه ؛ كان يدفع منها 70 جنيهاً إيجار الجراج لسيارة لا يملكها سيارة أمه ويعيش الشهر كله ب 300 جنيه لا غير يتذكر حين دخل على مرتضى الصراف كي يقبض أول ماهية فوجد صائب بيه مدير عام بالمؤسسة يجلس ينتظر دوره ، كان الكرسي المقابل له فارغ لكن حامد لم يكن ليجرؤ على أن يجلس :

فنظر إليه صائب بيه وقال : ما تجلس يا إبني واقف ليه ؟

فرد حامد : ما يصحش يا فندم

صائب بيه : إيه اللي ما يصحش كرسي فاضي ما تقعد تنتظر دورك وبعدين خدها مني نصيحة :

حامد :إيه يا فندم

صائب بيه : الأدب زيادة عن اللزوم مع الناس غلط

يضع مرتضى الصراف المرتب أمام صائب بيه ويقول له :

-اتفضل يا صائب بيه مش هتعد الفلوس ؟

فقال له صائب بيه : طبعاً هأعد الفلوس هو أنا تايه عنك

(يعد صائب بيه المرتب فيجد أنه ناقص 250 جنيه )

صائب بيه : شفت أنا عارف حركاتك يا مرتضى المرتب ناقص 250 جنيه

يضحك مرتضى الصراف : مانا عارف بس بأشوفك صاحي لا لأ؟

صائب بيه : إوعى تعمل الحركات دي مع حامد تلاقي مرتبه ما يستحملش

مرتضى الصراف : إنت مرتبك كام يا حامد ؟

حامد بسذاجة : مرتبي 370 جنيه

يرد صائب بيه للمرة الثانية أنصحك ما تقولش مرتبك لحد

حامد : ده الصراف وفي إيده الكشف اللي فيه المرتب

صائب بيه : برضه ولو

حامد : متشكر لحضرتك بتنصحني رغم إني موظف صغير وفي قسم تاني غير قسم حضرتك

صائب : كويس إنك ما جيتش عندنا شوية أوباش لكن خاللي بالك من الأخطبوط اللي عندكم

حامد : حضرتك تقصد مين ؟

صائب : هيكون مين الأولعبان أبو مليون وش رئيس قسمك

يشعر حامد إن صائب بيه هيبدأ يلبخ في الكلام وممكن أي حد معدي يسمع الشتائم فيذهب إلى الأخطبوط ويبلغه أن حامد يشتم فيه بصحبة رئيس قسم مناظر

فجرى حامد وهو يقول لصائب بيه :

إن شاء الله إن شاء الله شكرا لحضرتك

_____________________تمت_____________________