مالكيش حل
مجموعتي الرابعة (تلاتين سنة) بقلم د/ خالد الشريف النص السابع والعشرين بعد المائة 127-( مالكيش حل )
رحت مدرسة شوكت الإعدادية بعد ما حولوا ملفي من مدرسة رشدي يوم واحد كان يوم خميس لا أذكر سوى حصة واحدة حضرتها وكانت لغة عربية وحاول فيها المدرس تشجيعي على الاستمرار في المدرسة فقد وجدني ابن ناس يمكن يطلع مني بدرس خصوصي ولا حاجه لكنه للأسف جه يكحلها عماها فبعد أن استدعاني على السبورة اكتب إجابة تمرين هايف وزعه علينا وجدته يباغتني بسؤال غبي وأنا داخل لمكاني بعد أن كتبت الإجابة على السبورة وراجع قائلا:
- مش إنت اللي بتخاف تعدي شارع أبو قير؟
فأحرجت بشدة أمام الفصل ورديت على استحياء
- لأ يا مستر مش أنا 😂
هو شعر أنه لبخ فلم الدور وقال: اه اه ده واحد تاني
في نفس الوقت كانت أمي في مدرسة رشدي تواجه أستاذ مهدي مدير المدرسة
- يعني إيه يا استاذ مهدي تحولوا واحد طالع الأول على المدرسة يبقى أنتوا بتحاربوا التفوق ده كلام وبعدين أنا ابني صغير مش هيعدي شارع أبو قير
( راح عامل حركة وفاتح درج المكتب اليمين)
فنظرت له أمي شذرا ثم استكملت كلامها
- يوم السبت ملف الولد يرجع المدرسة تاني إحنا تربية وتعليم زي بعض يا استاذ مهدي ماتضطرنيش اروح الإدارة يا استاذ مهدي ومش هيحصل كويس
- خلاص علشان خاطر حضرتك زميلة لكن أنا كنت بأنفذ تعليمات وموقفي سليم
وقد كان يوم السبت كنت في نفس فصلي في مدرسة رشدي 2-4 وباستعد لانتخابات أمين الفصل كمان
المرة الثانية اللي رحت فيها مدرسة شوكت كانت بعدها ب عشرين سنة وأنا استاذ مشرف على مجموعات التربية العملية هناك قابلت مرتضى زميلي في الكلية ورابعنا أنا وحكيم وأدهم أيام الدراسة في الكلية
مرتضى ذلك الملحن السكندري المغمور الذي ذهبت له وهو مشرف على تأجير ترابيزات البلياردو المفرودة في غرف مبنى فندق سان ستفانو
القديم قبيل هدمه وتحويله إلى سان ستفانو جراند بلازا في أحد أيام صيف 1996 المفقود وفي يدي كلمات أغنية حميد الشاعري التي نزلت على غلاف ألبومه الذي عاد به من الإيقاف ( لوين) ولم يضيف تسجيلها في الشريط نزلت كلمات فقط فطلبت من مرتضى أن يلحنها فلحنها لحن جميل كان اسمها ( مالكيش حل) أسهل ما فيكي أصعب ما فيكي واللي مصبرني عليكي إني بحبك محتل
إلا أن حميد استدرك ونزلها بعد كده في ألبوم من ألبوماته الجماعية من ألحانه هو وكان لحنها أجمل من اللحن اللي عمله مرتضى 😀
قابلت مرتضى بعدها بسنوات وهو مدرس في مدرسة شوكت وأنا مشرف على مجموعات تربية عملية من الكلية
- ازيك يا مرتضى أنا دورت على نمرتك سنين مالقيتهاش
- ازيك يا حامد إوعى تكون لسه زعلان إحنا كنا طلبة ولسه صغيرين
- انا عمري مازعلت منك بتشوف أدهم وحكيم؟
- اخر تواصل معاهم كان اول تعييني كنا كلنا في مطروح مع بعض
- كانت أحلى أيام
- ممكن نتقابل تاني؟ ان شاء الله
- تفتكر ممكن يكون بيننا لقاء تاني والدنيا أخدت كل واحد في اتجاه؟
- إن شاء الله أكيد هنتقابل
- فاكر أغنية مالكيش حل؟
- إنت لسه بتعزف؟
- عمر الدنيا ما أخدتني من هواياتي
- طالما إنت لسه بالروح الجميلة دي أكيد هنتقابل تاني
----------------------------- تمت ------------------------------
تعليقات
إرسال تعليق